Senin, 22 Februari 2010

Tasalah Jadwal


Malam senin, waktu aku handak guring mataku ngantuk banar sudah, padahal hanyar jam sapuluh. Ku pacul kacamataku, ku andak tang ranjang kamar. Habis tu hanyar ku itihi jadwal kuliahku gasan isuk.

“Oh, jam sembilan jua,” kawa ba’santai. Sabalum guring aku badoa. Kada lawas habis tu, taguring dah ku sampai pagi.

Aku kada ingat bamimpi apa, nyaman banar dah guring malam tadi. Habis minum ubat pang jua ku malam tadi, apa da lagi taguring banar ku. Parak jam anam hanyar ku bangun. Lagi datang bulan pang, jadi kada apa-apa kalu ku malandau. Ku simpuni buku-buku gasan kuliah, habis tu manyatrika baju. Lambat banar ku gawi barataannya, masih jam tujuh jua.

“Tok…tok…tok…Dhe…” ada yang mangatuk lawang kamarku.

“Eh? Husnul? Napa sungsung banar? Jam barapa gerang kita masuk?” Husnul maambili aku nang kaya biasanya jua, tapi ni sungsung banar kalu meambili jam seini.

“Kita masuk jam setengah delapan Dhe…”

“Hah? Bujur-bujur?” ancap kuambil jadwal. Astagfirullah… malam tadi aku salah malihat jadwal.

“Satumatlah, aku mandi dulu” langsung kuambil anduk, ancap ku turun ke kamar mandi. Syukur kada baantri. Biasanya jam seini banyak yang baantri mandi.

Kada lawas aku babaju, maambil sapatu hanyar ka parkiran kandaraan. Ku cuba memanasi kandaraan, tapi kada mau hidup jua. Astagfirullah… kenapa pulang kiandaraanku ni? Dua hari pang sudah kada ku pakai. Maraju kah jua? Ku cubai lagi, tapi kada mau jua. Husnul yang malihat aku kangalihan manyalai kandaraan langsung mandatangiku. Mambantui mangangkat kandaraan. Tapi nang ngarannya kami ni halus-halus urangnya. Aku 146cm na tahu am Husnul barapa, nang jalas inya tu awaknya halus pada aku. Dua urang halus nang kaya kami ni, kada kuat jua mangangkat kandaraan Mio yang barat. Batis ku tatindih ban balakang kandaraan sakit banar rasanya. Tapi, kada papa kami cubai pulang. Alhamdulillah… pas nang kadua bisa kami naik akan, hanyar ku cuba manyalai pulang. Dingin banar ai kandaraan ni pinanya.

Sampai di kampus, kami mancari kalas. Talambat dua puluh manit, syukur Dosen kada sarik.

Ya Allah… alhamdulillah… bisa sampai jua kami ka kampus. Kainanya kuitihi lagi bujur-bujur jadwal kuliah. Biar kada talambat pulang kami masuk kuliah.